Tá leagan úr den app chun éisteacht le Raidió Rí Rá ar d’fhón phóca ar fáil anois. Tá na mílte daoine tar éis feidhmhchlár Raidió Rí Rá don iPhone a íoschóipeáil in aisce ó iTunes ó seoladh é ag tús 2010, agus is féidir le héisteoirí éisteacht leis an gcairtstáisiún Gaeilge tríd an iPhone ag am ar anois, leis an app nua seo.
Is é Raidió Rí Rá an t-aon stáisiún a sheinneann ceol ó na cairteacha ar fad trí mheán na Gaeilge tríd an bhliain ar fad ar líne ag www.rrr.ie, le cláir á gcur i láthair ag an óige, don óige. Tá súil ag an cairtstáisiún go gcuirfidh app nua Raidió Rí Rá i mbarr 25 na gcairteacha íoslódála iTunes.
Dúirt Aodhán Ó Deá, láithreoir Raidió Rí Rá, “Tá Raidió Rí Rá ag dul ó neart go neart le tamall anuas agus theastaigh uainn feidhmchlár an stáisiúin a fhorbairt chun sin a chur in iúl dár lucht éisteachta iPhone. Leis an nuashonrú seo, táimid ag iarraidh ar éisteoirí a rá lena gcairde go bhfuil áis iontach cheoil agus Ghaeilge ar fáil dóibh ó Raidió Rí Rá gan costas ar bith, agus iad a spreagadh leis an app a íoschóipeáil in aisce ó www.rrr.ie/iphone/” Tá obair idir lámha ag Raidió Rí Rá chun feidhmchlár Android a fhorbairt faoi láthair, tá an cairtstáisiún ag amharc ar fhéidearthachtaí dul ar an gcóras DAB agus tá siad ag dul i dtreo na teilifíse digití amach anseo chomh maith. D'eisigh Raidió Rí Rá Albam Rí-Rá i gcomhar leis an Irish Daily Star i mí an Mhárta, albam le hamhráin ó na cairteacha aistrithe go Gaeilge ag leithéidí The Rubberbandits, The Coronas, Fox Avenue agus eile.
